ORACIÓNS SEMANA 26 - 30 SETEMBRO

26 de setembro

+ No nome do Pai e do Fillo e do Espírito santo.

EVANXEO SEGUNDO SAN MATEO 22, 35-39

      E un deles preguntoulle con ánimo de poñelo a proba: - Mestre, cal é o mandamento maior da Lei? El díxolle: - Amarás ao Señor, o teu Deus, con todo o teu corazón, con toda a túa alma e con toda a túa mente. Este é o maior e o primeiro mandamento. O segundo é semellante a este: Amarás ao teu próximo como a ti mesmo.

COMENTARIO PARA A REFLEXIÓN:

      Na época na que se escribe o evanxeo discutíase acerca de se próximo era só quen pertencía ao pobo de Israel ou tamén o estranxeiro que se instalou nas súas terras. Xesús amplía o sentido de próximo a todos os seres  humanos. Este amor non é un sentimento, unha simpatía que brota espontaneamente, senón un comportamento  solidario cos outros: os próximos e queridos e os menos próximos e os non queridos.

      San Vicente fai efectivo ese amor ao próximo, ao máis necesitado, aos abandonados pola sociedade.

      Imos pensar cantas veces condicionamos o noso agarimo polos demais e cantas veces non aceptamos o agarimo que outros nos ofrecen.

ORACIÓN FINAL: Terminamos rezando xuntos o Nosopai.

     

27 de setembro: FESTA DE SAN VICENTE DE PAÚL

+ No nome do Pai e do Fillo e do Espírito santo.

      Hoxe é un día grande para nós, celebramos o día de San Vicente de Paúl. Vicente fixo efectivo o amor ao próximo e foi capaz de enredarse pola xustiza, para dignificar á persoa.

ESCOITAMOS A ORACIóN POLA PAZ E A XUSTIZA

Señor, ti dixeches que cuantos traballan pola paz serían chamados fillos e fillas  de Deus.

Concédenos entregarnos sen descanso a instaurar no mundo a única xustiza que pode garantir aos homes e mulleres a verdadeira paz.

Señor, que co teu amor paternal gobernas o mundo, rogámosche que todos os homes a quen deches unha idéntica orixe, constitúan unha soa familia na paz e vivan sempre unidos polo amor fraterno.

Señor, creador do mundo, baixo cuxo goberno se desenvolve a marcha da historia; atende as nosas súplicas e concede a paz aos nosos tempos difíciles.

Señor da Paz, ti es a mesma xustiza: por iso o home violento non te comprende nin o corazón cruel  é quen de aceptarte; fai que os bos perseveren no ben e os que están enfrontados recuperen a paz co esquecemento do odio. Amén

Rezamos todos xuntos o Pai Noso.

28 de setembro

+ No nome do Pai e do Fillo e do Espírito santo.

ESCOITAMOS A HISTORIA DO VOO DO FALCÓN

      Un rei recibiu como obsequio dous pequenos falcóns, e entregounos ao mestre de cetrería para que os adestrase.

      Uns meses despois, o mestre informoulle ao rei de que uno dos falcóns estaba perfectamente, pero que ao outro non sabía que lle sucedía, pois non se movera da rama onde o deixou desde o día en que chegou.

      O rei mandou chamar a curandeiros e sanadores para que visen ao falcón, pero ninguén puido facer voar a ave. Encargou entón a misión a membros da corte, pero nada sucedeu. Ao día seguinte, pola xanela, o monarca puido observar que a ave aínda continuaba inmóbil. Entón decidiu comunicar ao seu pobo que ofrecería unha recompensa á persoa que fixese voar ao falcón.

      Á mañá seguinte, viu á ave voando axilmente polos xardíns. O rei, sorprendido, pediu á  súa corte que lle trouxesen ao autor dese milagre. Desa maneira, trouxeron fronte ao monarca un humilde campesiño.

      O rei preguntoulle: - Ti fixeches voar ao falcón? Como o fixeches? Es meigo? Intimidado, o campesiño díxolle ao rei: - Foi fácil, meu rei, só cortei a rama, e o falcón voou, deuse conta de que tiña ás e marchou voando .

PREGUNTAS PARA A REFLEXIÓN:

 Sabes que tes ás ?

 Sabes que podes voar ?

 A que te estás agarrando ?

 De que non te podes soltar ?

 Que estás a esperar para voar ?

29 de setembro

+ No nome do Pai e do Fillo e do Espírito santo.

XESTOS QUE CAMBIAN O MUNDO

      O camiño máis longo comeza cun paso, a árbore máis grande cunha pequena semente, o libro máis grande cunha palabra, o cadro máis inmenso cunha simple pincelada...

      Si... non hai nada grande, non hai nada importante que non empece por algo pequeno. Así é a vida! E isto, o pequeno, convértenos en grandes poderosos, porque todos, ti tamén, podemos o pequeno; se cadra non podemos grandes cousas, pero podemos o pequeno. Somos poderosos... por tanto é necesario descubrir cal é o teu poder, cal é o teu “xesto” para cambiar o mundo: contigo mesmo, cos demais, coas cousas,... pénsao por un instante.

      Ponlle nome ao teu poder, ao teu superpoder, ao teu pequeno gran poder.

      Si! Ti tamén tes poder para cambiar o mundo e, como dicía o Tío Ben a Peter Parker en Spiderman, “todo gran poder leva unha gran responsabilidade”. Nas túas mans está que é o que decidas facer co teu poder. Así... a cuestión será que xesto podo e quero facer eu para contribuír ao cambio do mundo. Pequenos xestos xeran grandes cambios. O Deus de Xesús alenta e promove en nós a capacidade de facer realidade novos pequenos xestos cada día para cambiar o mundo. Enredémonos pola xustiza e cambiemos este mundo.

30 de setembro

+ No nome do Pai e do Fillo e do Espírito santo.

SETE PENSAMENTOS PARA O DÍA

Lemos pausadamente meditando o significado de cada frase:

      FE: Non debemos perder a fe na humanidade que é como o océano: non se ensucia porque algunhas das súas pingas estean sucias. (Ghandi).

      DEUS: Cando creas que Deus non escoita, escóitao dentro (anónimo).

      DIFICULTADE: Por moi longa que sexa a tormenta, o sol sempre volve brillar entre as nubes (G. Khalill).

      LIBERDADE: A liberdade é un luxo que non todos poden permitirse (V.B.Otto).

      FELICIDADE: A felicidade é interior, non exterior; por tanto, non depende do que temos, senón do que somos (Anónimo).

      ESPERANZA: A esperanza é o soño  dun home esperto. (Aristóteles).

      AVARICIA: O avaro non posúe as súas riquezas, senón que estas o posúen a el. (Bion de Esmirna).

      Cadaquén que elixa un destes pensamentos como lema para o día.

NOSOPAI