ORACIÓNS CORESMA 15-16 FEBREIRO

XOVES 15 FEBREIRO. NO NOME DO PAI, DO FILLO E DO ESPÍRITO SANTO

CINZA: UN XESTO QUE SIMBOLIZA MOITO

EVANXEO:  Mateo 6, 1-6. 16-18

Tede coidado de non practicardes a vosa xustiza para que vos vexa a xente, que daquela o voso Pai celestial non vos dará recompensa ningunha.

Cando deas unha esmola non o vaias proclamando diante de ti cunha trompeta, como fan os hipócritas nas sinagogas e nos rueiros para seren loados polos homes; asegúrovos que xa recibiron a súa recompensa. Ti, en troques, cando deas unha esmola, que non saiba a túa man esquerda o que fai a dereita. Así a esmola será secreta e teu Pai, que ve o segredo, xa te recompensará.

Cando recedes non fagades coma os hipócritas, que gustan de rezar moi ergueitos nas sinagogas e nos recantos das rúas para que os vexa a xente; asegúrovos que tamén recibiron a súa recompensa. Ti, pola contra, cando queiras rezar métete no teu cuarto, pecha a porta e rézalle a teu Pai que está no segredo; e teu Pai, que ve o segredo, hate recompensar.

Cando xaxuedes non poñades caras tristeiras, como fan os hipócritas: desfiguran as súas caras para que a xente llelo note. Asegúrovos que xa recibiron a súa recompensa. Ti, en troques, cando xaxúes, perfuma a cabeza e lava a cara, para que non che se note ante os homes, senón ante teu Pai celestial; e teu Pai, que ve o que está escondido, hate recompensar.

REFLEXIÓN

Este camiño cara á Pascua que é a Coresma, camiño marcado por actitudes sinceras de conversión comezou onte coa imposición da cinza.

Este xesto é un sinal de penitencia e de duelo xa presente no Antigo Testamento e un xesto que os cristiáns dos primeiros séculos facían frecuentemente en privado. Pero este xesto é simplemente un signo, un sinal visible dunha actitude interior.

Non podemos facer que a nosa práctica  coresmal se limite a grandes xestos externos, «para que nos vexan», senón que ten que ser unha conversión profunda do corazón.

Nestes corenta días prepárate, avalíate, proxéctate ao cambio, pono todo nas mans de Deus e lánzate á aventura de amar, de darlle sentido á propia existencia. É esta a mellor maneira de levar unha vida tranquila e en paz, baseada no amor.

VENRES 16 FEBREIRO. NO NOME DO PAI, DO FILLO E DO ESPÍRITO SANTO

SÉ FELIZ E FAI FELICES AOS DEMAIS;

NON SEXAS  CENIZO

EVANXEO: Lucas 9, 22-25

«Naquel tempo, dixo Xesús aos seus discípulos: «O Fillo do home ten que padecer moito, ser refugado polos anciáns, sumos sacerdotes e escribas, ser executado e resucitar ao terceiro día». Entón dicía a todos: «Se algún quere vir en  pos de min, que se negue a si mesmo, tome a súa cruz cada día e sígame. Pois o que queira salvar a súa vida, perderaa; pero o que perda a súa vida pola miña causa, salvaraa. De que lle serve a un gañar o mundo enteiro se se perde ou se arruína a si mesmo?».

REFLEXIÓN

A palabra  cenizo ten a súa orixe nunha planta que se chama  ceñiglo. É unha planta que consideramos mala herba, e non ten aspectos positivos nin utilidade algunha. Así, no século  XVI, empeza a utilizarse a palabra  cenizo para falar das persoas que teñen e producen mala sorte. Actualmente “ser  cenizo” tamén significa ser  aguafestas, non ter alegría e estar a se lamentar de todo. Como te adoitas comportar? Sabes que as emocións se contaxian?

LECTURA: A felicidade é contaxiosa (ABC, 20-08-2015)

Un estudo realizado con 2.000 adolescentes demostra que as amizades con bo estado de ánimo axudan a superar a depresión.

Os investigadores atoparon que a felicidade é un estado mental contaxioso e que relacionarse con persoas animadas é o mellor antídoto contra a depresión. Ademais, tamén puideron comprobar como, ao contrario do que ocorre coa felicidade, manter contacto con persoas deprimidas non aumenta o risco de padecer depresión; con todo, é unha gran maneira de axudar a estas a recuperar a felicidade. Polo que «o apoio social, e ter xente coa que falar diso, é esencial para recuperar a felicidade».

Rodearse de amizades con bo estado de ánimo e hábitos saudables ten un «gran efecto» na recuperación da depresión, así que «promover as relacións de amizade entre os adolescentes é un método efectivo» para conseguir alcanzar a felicidade.

VÍDEO: A verdadeira felicidade ( Into  the  wild)