BENVIDOS AO NOVO CURSO 2018-19

MARTES 18 SETEMBRO

No nome do Pai, do Fillo e do Espírito Santo

TEXTO BÍBLICO       ( Mc 6, 1-4)

“Naquel tempo, foi Xesús ao seu pobo en compañía dos seus discípulos. Cando chegou el, empezou a ensinar na sinagoga. A multitude que o oía preguntábase asombrada: «De onde saca todo iso? Que sabedoría é esa que lle ensinaron? E eses milagres das súas mans? Non é este o carpinteiro, o fillo de María? E os seus parentes non viven entre nós?»

MENSAXE

Estrear un novo curso é estrear ilusións e proxectos.

Facémonos preguntas coma estas: "Como será este curso? Lograremos crear un ambiente colexial onde sexa palpable a concordia, a amabilidade, a esixencia... e a comprensión duns con outros? Que froitos conseguiremos ao final do curso?

Certamente, en todos —profesores, familias e alumnos— están presentes os mellores propósitos e... moita ilusión e ESPERANZA!

Estes intres de oración e reflexión ao comezo de cada xornada, queren achegar ese empeño continuado por lograr un clima educativo no que os alumnos e profesores recibamos unhas noticias, unha reflexión, un consello, unha canción, un vídeo, unha imaxe…, que nos axuden a encher de valores e de sentido cada día. Pretenden dar esas pinceladas de reflexión, de recordo, de oración para que no traballo de cada día sexa  El, "o Mestre", quen alente e guíe o noso esforzo educativo.

REFLEXIÓN

Como e te atopas ao empezar a rodar no novo curso:  Malhumorado/a porque se che acabaron as vacacións? Alegre polo reencontro con compañeiros antigos e novos? Desconcertado/a ante as novidades que percibes?

Ten paciencia nestes primeiros días; ten ESPERANZA no novo curso.

ORACIÓN    Unha nova etapa

Señor,

hoxe inicio unha etapa nova,

un curso máis,

que me achega e leva

cara ás responsabilidades

que me esperan na vida.

Señor,

non sei o que me espera.

Sei que é unha aventura

e quéroa poñer na túa presenza,

como se pon unha ofrenda,

como se deposita unha promesa.

Desexo que sexas Ti o meu mellor mestre.

(Oración nova,  CCS,  p. 52)

MÉRCORES 19 SETEMBRO

No nome do Pai, do Fillo e do Espírito Santo

O RETO DE EMPEZAR

Co inicio do novo curso escolar empeza a viaxe polo fascinante mundo do coñecemento, do saber, da convivencia e da aprendizaxe.

Con afectuosos saúdos imos dando a benvida, situámonos nos nosos lugares de estudo e traballo con renovadas expectativas e desexos de compartir e desenvolver un agradable ano de traballo en equipo: alumnos, pais, titores, docentes, persoal de servizo e administración…; cada un de nós debe achegar a enerxía fundamental necesaria para facer realidade o noso proxecto educativo e o logro das metas que vaiamos poñéndonos.

Sempre custa empezar. É como poñer en marcha un motor que estivo moito tempo sen uso; cústalle arrincar.

Nós afrontamos o reto do novo curso ao ralentí, pero enseguida tomaremos aceleración e bo ritmo de marcha.

REFLEXIÓN

Existe a escola do "eu": é a escola individualista, formada polos mozos e mozas que tan só pensan en si mesmos. Existe a escola do "nós", onde se comparten as cousas, onde se vive en amizade. Xesús axúdanos a construír a escola da solidariedade e da esperanza.

Apúntaste a esta?

ORACIÓN - Todo é futuro

Señor,

no camiño da vida

todo mira cara a adiante,

todo é futuro.

Comezamos un novo curso;

queda atrás o gusto das vacacións.

Señor,

Hoxe comeza algo

que a primeira vista parece duro.

Ata teño a tentación de soñar e pensar

que oxalá se parase o calendario

nos días de vacacións.

Pero eu se que hai que seguir,

que hai que crecer

e tomar na man o temón da vida

e sucar o mar

ata a beira de alá.

Xuntos faremos unha historia

que será unha historia santa:

Ti estarás comigo,

eu estarei contigo.

XOVES 20 SETEMBRO

No nome do Pai, do Fillo e do Espírito Santo

EXPECTATIVAS ANTE O NOVO

TEXTO BÍBLICO       ( Mc 6, 34)

“Naquel tempo, esús viu unha multitude e tivo mágoa deles, porque andaban como ovellas sen pastor; e púxose a ensinarlles con calma”.

MENSAXE

O inicio do curso créanos a todos un certo grao de inquietude. Para algúns porque se estrean no colexio, para outros máis veteranos porque comeza un curso superior, máis complexo...

A continuación ofrecémosvos uns consellos básicos que vos axudarán a sentirvos seguros e capaces de afrontar con éxito o curso que comeza:

−     Organiza o teu horario de estudo tendo en conta tamén outras actividades de lecer ou formativas que che interesen. A organización no estudo é a clave do éxito.

−     Coñecer aos teus compañeiros e compañeiras axudarache a facer novos amigos, a sentirte máis integrado no colexio. Queda de cando en vez con algún deles para estudar, isto mellorará a motivación e tamén pode ofrecerche apoio en dúbidas concretas que poidades resolver xuntos.

−     Para estudar con eficacia cada día é importante atopar un ambiente no que esteas cómodo. Tamén podes utilizar outros espazos como bibliotecas.

Poñendo en práctica estes consellos podes comezar o curso poñendo boas bases.

REFLEXIÓN

Es dos que se organizan enseguida ou dos do “imos tirando”? Es dos que pos entusiasmo ante o novo ou dos que segues mirando cara atrás, cara aos días doces das vacacións?

ORACIÓN

Señor,

este curso que agora iniciamos

non é un elo perdido

nin unha tarefa inútil;

é un paso máis

no proxecto de ser persoa

que Ti nos encomendaches.

Ábrenos o corazón e a esperanza

para construír con alegría o futuro.